Aurrez aurreko botoa

Oro har, 09:00etatik 20:00etara egiten da bozketa, eta ez da eteten. Hasiera emateko mahaiko presidenteak honela dio: «bozketa hasi da», edo «empieza la votación».

Prozedura honako hau da:

1. Hauteslea: 
   
   • Etxean jaso duen errolda-txartelean agertzen diren lokalera eta mahaira doa. Ez badaki zein mahai dagokion, lokalean bertan dauden zerrendetan kontsulta dezake.
   • Botoari dagokionez, 2 aukera ditu:
     • Etxetik prestatuta eraman.
     • Botoa eman aurretik mahaian prestatu, eta horretarako, nahi izanez gero, hauteskunde-kabina erabili.
   • Mahaira hurbildu eta bere burua identifikatu. Jatorrizko dokumentu hauetako edozein (inoiz ez kopiak) erabil dezake identifikatzeko nahiz eta dokumentua iraungita egon:
     • Nortasun Agiri Nazionala (NAN).
     • Pasaportea (argazkiarekin).
     • Gidabaimena (argazkiarekin).
2. Bokalek egiaztatuko dute hauteslearen nortasuna eta erroldan izena emanda dagoela.
3. Hautesleak bozketako gutun-azala emango dio mahaiburuari.
4. Mahaiburuak, gutun-azala inoiz ezkutatu gabe, bozkatuko duenaren izen-abizenak esango ditu ozenki. Ondoren, «bozkatzen du» edo «vota» esatean, gutun-azala hautesleari itzuliko dio hautestontzian sar dezan.

Botoa eman ondoren, hautesleak aukera hauek ditu:

• Bere izen-abizenak boto-emaileen zerrenda zenbakidunean ondo idatzi diren egiaztatzea.
• Mahaiburuari botoa ematera joan dela egiaztatzen duen agiria eskatzea.

Talde zehatzei zuzendutako neurri eta bozketa-prozedurak daude:

• Gaixotasun edo desgaitasun fisikoagatik lekualdatzeko aukerarik ez duten pertsonentzako doako garraio-zerbitzua
• Ikusmen-desgaitasuna duten pertsonentzako Braille botoa
• Gaixoentzako edo ezintasunen bat dutenentzako notario-ahalorde bidezko botoa.